Әзірбайжандық ауыр атлет Қазақстанға келуі мүмкін
Қазақстанның ауыр атлетика федерациясы әзірбайжандық зілтемірші Ниджат Рагимовты құрамаға шақыруға ниетті. Қазіргі уақытта екі елдің федерациясы келіссөздер жүргізуде. Келіссөзлер аясында федерациялардың әріптестік қарым-қатынасы, спортшы және оның отбасының шешімдері де ескеріледі.
Әзірбайжандық спортшының біздің елге ауысуы жөнінде нақты шешім келіссөздердің қорытындысы бойынша қабылданады. Ниджат Рагимов – жас спортшы. Дегенмен зілтеміршіге біздің құрамадан негізгі орын берілмейді. Ол алдымен спорттық қағидалар бойынша біліктілігін дәлелдеуі тиіс.
Айта кетейік, Ниджат Рагимов 77 келі салмақ дәрежесінде 2010 жылы Сингапурде өткен жасөспірімдер арасындағы Олимпиада ойынында жеңіске жетті. 2013 жылы жасөспірімдер арасындағы Әлем чемпионатында екінші орын алды. Ал 2013 жылы Қазанда өткен Универсиадада жүлдесіз қалды.
