Көкшетауда бапкерлер кеңесі өтті
Ауыр атлетикадан 23 жасқа дейінгі жастар арасындағы ел біріншілігі аясында республикалық бапкерлер кеңесі өтті. Күн тәртібіндегі ең басты мәселе – Азия ойындары мен елімізде өтетін Әлем чемпионатына дайындық.
Бүгінде жылдың ең маңызды екі додасына қатысуға үмітті 31 спортшы анықталды. Олардың арасында ел чемпионатының жеңімпаздары (18-23 сәуір, Талдықорған) мен Олимпиада чемпиондары Илья Ильин, Светлана Подобедова, Майя Манеза және Зүлфия Чиншанло бар.
Азия ойындары мен Әлем чемпионатына қатысатын зілтеміршілердің нақты тізімі Олимпиада чемпионы Анатолий Храпатыйды еске алуға арналған турнирде (19-21 шілде) анықталады.
Жиын барысында бапкерлер кеңесі ауыр атлеттерге арналған допинг сынақ мәселесін де атап өтті, деп хабарлайды confederation.kz.
Алдағы уақытта өтетін республикалық және халықаралық турнирлер де талқыдан тыс қалған жоқ. Маусым айында еліміздің жас зілтеміршілері Қазан қаласында өтетін Әлем чемпионатында бақ сынайды.
Сонымен қатар, 3 жас категориясы бойынша (1996-1997 ж.т., 1998-1999 ж.т. және 2000 ж.т. және одан да кіші) ел чемпионаты да жалауын көтермек.
Естеріңізге сала кетейік, 23 жасқа дейінгі жастар арасындағы ел біріншілігі 25-29 мамыр аралығында Көкшетау қаласында өтіп жатыр. Жарысқа еліміздің бар аймағынан 196 спортшы қатысуда.
Елімізде алғаш рет чемпионат аясында Олимпиада ойындарының жүлдегерлері Ирина Некрасова және Мария Грабовецкаяның жүлдесі үшін турнир өтуде. 2008 жылы Бейжің Олимпиадасында Ирина Некрасова 63 келі салмақта күміс жүлде тағынса, Мария Грабовецкая +75 келі салмақта қола жүлдегер атанған еді.
Ел чемпионатының барлық жеңімпаздарына Ауыр атлетика федерациясының президенті Жанат Түсіпбеков тағайындаған арнайы сыйлықтар табысталуда. Ал Олимпиада жүлдегерлерінің атындағы турнир жеңімпаздарына Ақмола облыстық ауыр атлетика федерациясы тағайындаған ақшалай сыйлық ұсынылды.
Чемпионат пен турнир ҚР Спорт және дене шынықтыру істері жөніндегі Агенттік, ҚР ауыр атлетика федерациясы, Ақмола облыстық дене шынықтыру және спорт басқармасы және Ақмола облыстық ауыр атлетика федерациясының қолдауымен өтуде.
Ақмола облысынан әлемге танымал спортшылар қанат қақты. Олардың арасында даңқты ауыр атлет Джамалидин Панахов (әлем рекордшысы, халықаралық дәрежедегі бірінші спорт шебері), Александр Кубрин (КСРО құрметті спорт шебері), Вячеслав Андреев (әлемнің екі дүркін рекордшысы, КСРО чемпионы), Олег Тонуров (жасөспірімдер арасындағы әлем чемпионатының қола жүлдегері), Сергей Копытов (Азия ойындарының жеңімпазы, Еуропа мен Азия чемпионы, КСРО кубогінің 5 мәрте иегері, Азия рекордшысы), Сергей Шевченко (Қазақстан чемпионатының жеңімпазы және жүлдегері, ҚР еңбек сіңірген жаттықтырушысы), Мария Грабовецкая (Бейжің Олимпиадасының қола жүлдегері), Ирина Некрасова (Бейжің Олимпиадасының күміс жүлдегері), Анна Нұрмұхамбетова (Азия чемпионы), Фаина Сиванбаева (Азия чемпионатының қола жүлдегері), Екатерина Столяренко (жасөспірімдер арасындағы Азия ойындарының қола жүлдегер).
