Ауыр атлетикадан үш дүркін Әлем чемпионы Алматыда өтетін жарысқа қатыспайтын болды
Польша спортшысы Марцин Долега допингке қарсы ережелерді бұзғаны үшін уақытша шеттетілді.
Марцин Долега – ауыр атлетикандан үш дүркін Әлем чемпионы. Оны Польшаның ауыр атлетика федерациясы (PZPC) жазалап отыр. Федерация бұл шешімді Халықаралық ауыр атлетика федерациясының (IWF) мәліметі бойынша қабылдады.
Спортшыдан Ресейде өткен Президент Кубогы жарысында допинг-сынама алынған. Қанның құрамында тыйым салынған препараттардың көрсеткіші шамадан тыс екені анықталған. Қорытынды сараптама 15 күннен кейін белгілі болады, деп жазады «Р-Спорт».
Айта кетейік, Марцин Долега 105 келі салмақта үш рет Әлем чемпионы атанды. Ол 2004 жылы допинг қолданғаны үшін ескерту алып, Афиныдағы Олимпиада ойындарына қатыса алмады.
Еске сала кетейік, Алматы ауыр атлетикадан Әлем чемпионатын 8-16 қараша аралығында қабылдайды.
Фото: vebidoo.de
