Зарина Диас алғашқы айналымнан сүрінбей өтті

Қазақстандық теннисші Зарина Диас Страсбургте өтіп жатқан WTA турнирінде алғашқы айналымнан сүрінбей өтті.

Қазақ қызы бірінші айналымда осы турнирде үшінші болып тіркелген әлемнің 22-ші ракеткасы, бельгиялық Кристен Флипкенсті 6/2, 6/7, 6/3 есебімен ұтты. Тартысты кездесу 2 сағат 2 минутқа созылды.

«Флипкенс – жоғары деңгейлі ойыншы. Ол Уимблдон турнирінің жартылай финалына да шықты. Сондықтан бұл жеңіс өзіме деген сенімділікті алып келді. Мен оны кортта жылжытуға тырыстым, сеткаға жақын ойнадым және жоспарымның барлығы сәтті орындалды», - дейді қазақстандық теннисші. 

Зарина Диас екінші айналымда хорват теннисшісі Айла Томляновичпен кездеседі. Хорват қызы бірінші кезеңде корт иесі Кристина Младеновичтен басым түсті.

Айта кетейік, қазақстандық теннисші әлемдік рейтингте 96-шы орында тұр.

Фото: wtatennis.com