Евгений Донской мен Алена Сотникова «Президент кубогы-2016» жеңімпаздары атанды (ФОТО)

Евгений Донской мен Алена Сотникова «Президент кубогы-2016» халықаралық турнирінің жеңімпаздары атанды. Ерлер арасындағы ақтық сында ресейлік Евгений Донской отандасы Константин Кравчуктен басым түсіп, 6:3, 6:3 есебімен жеңіске жетті. «Қорытынды есепке қарамастан, кездесу өте қиын болды. Ақтық сындағы қарсыласыма әрі досыма көп рахмет. Бүгін жеңіске жете алғаныма өте қуаныштымын», -деді Евгений Донской матч соңында берген сұхбатында. Өз кезегінде әйелдер арасындағы финалдық тартыста Алена Сотникова ресей теннисшісі Вероника Кудерметованы 6:2, 6:3 есебімен жеңді. «Вероникаға рахмет, оған қарсы ойнау маған оңайға соққан жоқ», - деді турнир жеңімпазы кездесу аяқталған соң. Сонымен қатар турнир аясында 12 жасқа дейінгі балалар арасында Astana Masters President’s Cup турнирі өтті. Бұл жарыста астаналық Жанел Рүстемова мен Алматы қаласының тумасы Кирилл Колганов жеңіс тұғырынан көрінді. Аталған турнирдің финалында астаналық Жанел Рүстемова өскемендік Татьяна Николенконы 6:3, 6:2 есебімен жеңіп, бірінші орынды иеленсе, тағы бір Астана қаласының өкілі Сандуғаш Кенжібаева үшінші орынға қол жеткізді. Ұл балалар арасында өткен ақтық кездесуде алматылық Кирилл Колганов қарағандылық Эрик Жақияновпен кездесіп, 7:5, 6:2 есебімен басым түсті. Ал, жүлделі үшінші орын шымкенттік Бекжан Ережепке бұйырды. Аралас жұптық сында турнирдің Елизавета Гнилозубова (Астана) мен Арсланбек Айтқұлов (Қарағанды) жеңімпаздары атанды. Олар финалда алматылық Еркежан Арыстанбекова мен шымкенттік Бекжан Ережептен құралған жұпты 6:3, 6:2 есебімен жеңді. Бүгін әуесқой теннисшілер арасында өткен «Astana Open» турнирінің жеңімпаздары анықталды. Аталған жарыс осы аптада «President’s Cup» халықаралық турнирі аясында өткен еді. 30+ дәрежесінде ерлер арасында Нияз Туралин үздік атанса, 45+ дәрежесі бойынша Аманжол Раисов жеңіс тұғырына шықты. Ал, әйелдер арасында жарыс жеңімпазы Марзия Абдулмәжит болды. Естеріңізге сала кетсек, «Kazsport» телеарнасы турнир ойындарының барлығын тікелей эфирде көрсеткен болатын. Фото: ktf.kz