Головкин - Уорд жекпе-жегі. Бұл мүмкін бе?
Кәсіпқой бокста WBA тұжырымы бойынша әлем чемпионы Геннадий Головкин америкалық боксшы Андре Уордпен жекпе-жекке шығуы әбден мүмкін екенін мәлімдеді.
«Алдымен 1 ақпандағы жекпе-жекті сәтімен өткізу керек. (Бұдан арғы жағдай туралы айтсам) Андре Уордпен жекпе-жекке шығудан үміттімін. Алайда, бұл бәсекенің уақыты әлі келген жоқ деп ойлаймын. Жекпе-жекке шығуымыз әбден мүмкін, бірақ дәл қазір емес», - деді Головкин.
Геннадий Головкин мен Андре Уорд жекпе-жегі 2014 жылы болуы мүмкін 12 бәсекенің тізіміне енген болатын. Мамандар бұл кездесуде Уордты фаворт санады.
Андре Уорд - 29 жаста. Кәсіпқой бокста 26 жекпе-жек өткізіп, барлығында жеңіске жеткен. Оның 14-ін нокаутпен аяқтаған.
Геннадий Головкин - 31 жаста. Кәсіпқой бокста 28 жекпе-жек өткізіп, барлығында мерейі үстем болған. 25-ін нокаутпен ұтты.
Еске сала кетейік, Головкиннің келесі жекпе-жегі 2014 жылдың 1 ақпанында Монте-Карлода ганалық боксшы Осману Адамамен өтеді.
Фото: profiboksz.hu
