Болгарияда бокстан жастар арасындағы Әлем чемпионаты басталады

Бүгін, 14 сәуірде Болгария астанасы Софияда бокстан жастар арасындағы Әлем чемпионаты басталады. Жарысқа әлемнің 90 елінен 522 боксшы қатысады. Ал Қазақстан намысын бұл бәсекеде 13 боксшы (10 ер, 3 қыз) қорғайды. Әзірбайжан, Германия, Ұлыбритания, Венгрия, Беларусь, Қырғыз Республикасы, Ресей, Түркия, Украина, АҚШ және Өзбекстан құрамалары да барлық салмақта боксшыларын әкелген. Өйткені, София шаршы алаңында жеңіске жеткендерге тамыз айында Қытайдың Нанкин қаласында өтетін жастар арасындағы Екінші Олимпиадалық ойынға жолдама беріледі. Өткен Әлем чемпионатында Қазақстан қоржынында бір ғана қола медаль болды. Оны 75 келіде Дәулет Байғабатов жеңіп алған еді. Биыл Ғалымбек Кенжебаев бастаған жастар құрамасының жаттықтырушылар құрамы нәтижені жақсартуды мақсат етіп отыр. Оның үстіне командаға сайдың тасындай іріктелген саңлақтар жиналған. Құрамада жасөсіпірімдер арасындағы екі Әлем чемпионы мен мен жастар арасындағы бес Азия чемпионы бар. Әлем біріншілігінде шаршы алаңға алғаш болып 52 келіде Оразхан Ергеш шығады. Оның қарсыласы – италиялық Винченцо Колелла. 15 сәуірде Сұлтан Заурбек (56 келі) пен Абылайхан Жүсіпов (60 келі) алғашқы жекпе-жектерін өткізеді. Екеуі де Азия чемпионы. Оның үстіне Абылайхан Жүсіпов Таиландта өткен чемпионатта ең үздік боксшы деп танылды. Сонымен қатар, жасөспірімдер арасында Әлем чемпионы атанды. Оның қарсыласы – АҚШ боксшысы Очоас Исидро. Ал Сұлтан бутандық Самдруппен жұдырықтасады. 16 сәуірде тағы бір талантты боксшы, жасөспірімдер арасындағы Әлем чемпионы Рахат Маржықпаев (69 келі) келесі айналымға шығуға тырысады. Ол үшін кореялық Жинхун Парктен басым түсуі керек. Азия чемпионы Аян Қалибеков (64 келі) ирландиялық Уэйн Келлимен жұдырықтасады. Ал Назым Ихсанова (60 келі) алғашқы жекпе-жегін польшалық Жустина Валаспен өткізеді. 17 сәуірде Алуа Балқыбекова (51 келі) молдовалық боксшы Екатерина Карппен кездеседі. Кейін шаршы алаңға Азия чемпионатында бірінші орын алған ауыр салмақтағы боксшылар көтеріледі. Жеребе бойынша Темірлан Қабиев (91 келі) алжирлік боксшы Юсуф Бузидпен кездеседі, ал Елдос Қадырбаевтың (+91 келі) қарсыласы – тәжік Далерджонм Сулейманов. 18 сәуірде Валентина Хальзова (75 келі) мен қытайлық Симин Чен жұдырықтасады. Ал Бекжан Бәкіров (75 келі) Темирлан Чойунбек (Қырғыз Республикасы) пен Юлиан Иванов (Румыния) арасындағы жекпе-жектің жеңімпазымен кездеседі. 19 сәуірде Шалқар Айқынбай (49 келі) жарысты екінші айналымнан бастайды. Оның қарсыласы - Михаил Остроумов (Израиль). Жастар арасындағы Азия чемпионы Вадим Казаков (81 келі) келесі кезеңнің жолдамасына австралиялық Рейган Дезземен таласады. Фото: boxingsofia2014.org