WSB. Асхат Уәлиханов Гайбатулла Гаджиалиевтан ұпай санымен ұтылды

Дүниежүзілік бокс сериясының жартылай финалындағы «Астана арландары» мен «Baku Fires» арасындағы жекпе-жектер жалғасуда. Астанада өтіп жатқан айқаста шаршы алаңға үшін болып 64 келі салмақта Асхат Уәлиханов пен Гайбатулла Гаджиалиев шықты. Бұл салмақта алдын-ала тізімде Жәнібек Әжібай тіркелген еді. Дегенмен бас бапкер Асхат Уәлихановтың жұдырықтасқаны жөн деп шешкен. Асхат та жекпе-жекке тас-түйін дайын екенін мәлімдеген болатын. Айта кетейік, Асхат Уәлиханов бұл маусымдағы алғашқы жекпе-жегін әзірбайжандық Осман Әлиевпен өткізіп, жеңіске жеткен еді. Жалпы, ол WSB аясындағы төрт жекпе-жектің үшеуін өз пайдасына шешті. Гайбатулла Гаджиалиев те бұл маусымда өткізген төрт жекпе-жектің үшеуін жеңіспен аяқтаған. Әзірбайжандық боксшы бұл жолы да бабында екенін көрсетті. Асхатты ұпай айырмашылығымен жеңіп, командасының қоржынына 2-ші ұпайды салды. Айта кетейік бұған дейін Теміртас Жүсіпов жекпе-жекті жеңіспен аяқтады. Ал, Мәди Шолақов қарсыласқа есе жіберді. Енді шаршы алаңға 75 келіде Сергей Деревянченко мен 91 келіде Василий Левит шығады.