Сойлыбаев пен Сарқұловтың промоутерлері 2015 жылы титулдық кездесулер ұйымдастырмақ
Құрамына жас қазақстандық боксшылар Бекман Сойлыбаевпен Елдос Сарқұлов кіретін Diamond Ring промоутерлік компаниясы алдағы уақытта қос спортшыны жаңа деңгейге шығармақ. Компания Бекман мен Елдосқа интерконти чемпиондары немесе Азиялық-тынық мұхиттық аймақтың чемпиондары белбеуіне таласуына мүмкіндік беретін кездесулер ұйымдастыруды қолға алмақ.
Бекман Сойлыбаев пен Елдос Сарқұлов үшін өткен жыл елеулі оқиғаларға толы болды. Ең алдымен олар әуесқой бокспен қош айтысып, кәсіби бокс әлеміне қадам басты. Екеуі де әуесқой бокста жақсы тәжірибе мектебінен өткен спортшылар. Және ең бастысы олар сол уақытта қатаңдықты әрі үлкен еңбекті талап ететін бокс әлеміне енуге дайын болды. Әрі үлкен боксқа зор сенімділікпен адымдады.
Қос боксшының жетістікке жетуіне ат салысатын Diamond Ring компаниясы промоутерлік бизнестегі Америка мен Еуропаны тәжірибесіне негізге ала, әрі ағайынды Кличколардың «K2promotions» компаниясымен ынтымақтастық орната отырып, қазақстандық боксшыларды кәсіби бокстың жаңа асуларына жетелейтін стратегия жасақтап шығарды. Қос боксшының әуесқойдан кәсіби боксқа ауысқандарына аз уақыт бола қойса да, бүгінгі күнге дейін олар үш кездесу өткізіп, үшеуінде де жеңіске қол жеткізді. Ал, олардың 13 желтоқсан күні Киевтің Спорт сарайында өткізген кездесулері бокс кешінің нағыз әшекейіне айналды. Украиндық мамандар және әлемнің экс-чемпиондары Вячеслав Сенченко, Владимир Сидоренко, Сергей Дзинзирук жігіттердің бойындағы әлеуеттеріне өздерінің үлкен бағаларын берді. Олардың айтуынша - дәл қазір боксшылар кәсіби мансаптың келесі қадамына аттауға дайын және мұнымен тоқтап қалмай, ары қарай жұмыс жасау қажет, сонымен қатар, қарсыластардың дәрежесі мен сапасын төмендетпеу керек.
Бекман мен Елдос Киевте сәтті өткізген кездесулерінен кейін Алматыға үйлеріне оралды. Алайда олар мұнда ұзақ болмайды. Себебі, Diamond Rind қазірдің өзінде 2015 жылға жоспарланған титулдық кездесулерге дайындалу мақсатында Американың жетекші залдарында оқу-жаттығу жиындарын өткізу туралы келіссөздер жүргізу үстінде.
Sk-Sport.kz
