Кәсіпқой боксшы Қанат Ислам балаларға сый жасады

Кәсіпқой боксшы, Бейжің Олимпиадасының қола жүлдегері Қанат Исламды үлгі тұтатындар қатарында атыраулық жас өрен­дер де көп. Бұл оның мұнайлы өңір жастарымен кездесуінде айқын аңғарылды.

Даңқты спортшы алдымен Сабыр Қазыбаев атын­дағы мектеп-интернат тәрбие­лену­ші­лерімен кездесіп, спорт­тағы же­тістіктері жайында айтып бер­ді. Мұнда оқушылардың кон­цер­тін тамашалап, ата-ананың аялы ала­қаны мен мейіріміне зәру бала­­ларға плазмалық теледидар тарту етті.

«Интернатта жатудың жағ­­дайын, ата-анадан жырақ жүрудің қаншалықты қиын екенін жақсы түсінемін. Мен де 11 жасымнан бастап спортқа дайындалу мақсатында интернатта тұрдым. Өйткені, асқақ арманым болды. Сол мақсатқа жету үшін талай қиындықты да бастан өткердім,» – деді әр баланың басынан мейір­лене сипаған Қанат.

Атырау жастарына жігер беріп, олардың болашағына қанат бітіруді көздеген ол: «Өзімнің де балаларым бар. Дегенмен, жұбайым­мен кеңесіп, болашақта бала асырап алу ойымда бар. Ол әр отбасының борышы болуы тиіс»,-дейді.

«Сіздерге мына бір нәрсені айтқым келеді. Өмірде түрлі жағ­дайлар болады. Кейде салың суға кетіп, бәріне қолыңды бір сілтегің  келеді. Бірақ, мұндай кездерде өзіңді қолға алып, табандылықты одан әрі еселей түсу керек. Біз таңдай қағып жүрген чемпиондар жетістікке бір ғана мақсаттың арқасында жетті. Ол – ешқашан берілмеу. Осы қағиданы өмірлік ұстаным етіп алатын болсаңыздар, әрқашан жеңіске жетесіздер,»– деді  Қанат Ислам.

Спортшы бұдан соң жергілікті студенттермен де жүздесіп, ше­берлік сағатын өткізді.

_egemen.kz