«Astana Arlans» жартылай финалдың алғашқы кездесуін жеңіспен бастады
Бүкіл әлемдік бокс сериясының алғашқы жартылай финалдық кездесуінде «Astana Arlans» бокс клубы Шеффилд қаласында британдық «British Lionhearts» клубын 3:2 есебімен жеңді.
49 келі салмақта Теміртас Жүсіпов төрешілер шешімімен Галал Яфайға есе жіберсе, ауыр салмақта Арбек Абуғаниев Чавон Кларктан айласын асыра алмады.
Ал, қалған кездесулердің бәрінде қазақстандықтар айқын басымдықпен жеңіске жетті. 56 келі салмақ дәрежесінде Ілияс Сүлейменов Ниал Фаррелді жеңсе, 64 келіде Ділмұрат Мижитов Далтон Смитті сан соқтырды. Әбілхан Аманқұл болса Бенджамин Уйттакерді төрешілердің бірауыздан шығарған шешімімен жеңіске жетті.
Жартылай финалдық кездесудің қарымта жекпе-жектері 26 мамыр күні Атырау қаласында жоспарланған.
