Аударыспақтан ІІ Ашық Азия чемпионатын "Kazsport" телеарнасынан тамашалай аласыздар

Қытай Халық Республикасы, Іле-қазақ автономиялық облысы, Өртекес ауданында Аударыспақтан ІІ Ашық Азия чемпионаты жалауын желбіретті. Дүбірлі доданың бас серіктесі – «Самұрық-Қазына» Ұлттық әл-ауқат қоры. Ашылу салтанатында сөз алған ҚР Ұлттық спорт түрлері қауымдастығының президенті Бекболат Тілеухан екі ел арасындағы ерекше достықты тілге тиек етті. «Қытай Халық Республикасы мен Қазақстан Республикасы көршілес ел ғана емес, бізді берік достық, ауызбіршілік, ынтымақтастық әріптестік байланыстырады. Осының арқасында біздің Ұлттық спорт түрлері ерекше қарқынмен дамып, үлкен жетістікке жетіп отыр. Сөзімнің дәлелі бүгінгі Аударыспақтан ІІ Ашық Азия чемпионаты», – деді. Дүбірлі доданың телеарналық нұсқасын бүгін 21:55-те, ертең 19:30-да, ал сенбі күні 17:55-те "Kazsport" телеарнасынан тамашалай аласыздар.