«ҰЛЫ ДАЛА РУХЫ» фестивальі өз мәресіне жетті
Астана қаласының 20 жылдығына орай ҚР Мәдинет және спорт министірлігінің ұйымдастырумен Астана қаласы «Қазанат» атшабарында Республикалық «Ұлы дала рухы» фестивалінің қортынды сайыстары аяқталды.
Үш ай бойы республиканың барлық өңірлері 4 аймаққа бөлініп өз мықтыларын анықтаған болатын. Өңірлерден үздік шыққан құрамалар финалдық бәсекеде бақ сынады. Фестиваль жеті спорт түрінен ұйымдастырылды. Олар: көкпар, асық ату, тоғызқұмалақ, қазақ күресі, аударыспақ жамбы ату және теңге ілу.
Жамбы ату бойынша Түркістан облысы бірінші орынды иеленді. Екінші орынды Шығыс Қазақстан алса, үшінші орынға Ақтөбе спортшылары лайық табылды. Және үздік төрттікті Ақмола облысы қортындылады.
Теңге ілу сайысында да Түркістан облысы спортшылары жеңімпаз атанды. Ізжанов Ғалымжан және Қамбаров Рахат, Садуақас Нұрбағлан барлық қарсыластарынан басым түсті. Екінші орын БҚО, үшінші орын Ақмола облысы, төртінші орын Қарағанды облысына бұйырды.
Аударыспақ спорты бойынша Ақмола мен Батыс Қазақстан облысы финальдық кездесуде өзара сынға түсіті. Тартысты өткен кездесуде Ақмолалық аударыспақ алыптары чемпион атанды. Ал, үшінші орын үшін Жамбыл облысымен Шығыс Қазақстан таласты.
Тоғызқұмалақтан Павлодарлық команда Ақмола облысын басым түсіп жеңімпаз атанды. Ал, Атыраудан келген тоғызқұмалақшылар Түркістан облысының спортшыларына төтеп бере алмай, 4-ші орынды місе тұтты.
Асық ату спорт түрінен жастар арасындағы командалық есепте ҚР чемпионатының жеңімпаздары мен халықаралық «Алтын сақа» турнирінің чемпиондары саналатын Асанқұл Нұрбек, Бұланбай Аслан, Мыңтөре Нұрбақыттардың бұл сайыста жолы болмады. Олар финалда 2:3 есебімен Жамбыл облысынан келген асық атушыларға жол берсе, ақтөбеліктерді 4:1 есебімен қапы қалдырған Шығыс Қазақстандық спортшылары жүлделі ІІІ орынға ие болды.
Қазақ күресінен бозкілемде бел кеткенше белдескен балуандар аламнның қызығын келтірді. Финалда Түркістан мен Атырау облысының балуандары белдесіп, командалық жарыс нәтижесінде 7:1 есебімен оңтүстіктен келген апайтөс жігіттер күмәнсіз жеңіске жетті.
Көкпардан Маңғыстау облысы, Жамбыл облысы, Алматы облысы және Ақмола облысы бас жүлдені сарапқа салды.Финалдық бәсекеге Жамбыл облысымен Маңғыстаулық көкпаршылар жолдама алды. Көрерменнің делебесін қоздырған ойында Жамбылдықтардың мерейі үстем болды. Үшінші орын үшін таласта Алматылық көкпаршылар Ақмолалық спортшыларды қапы қалдырып, қола медаль еншіледі.
