Бүгін 5 боксшымыз шаршы алаңға шығады

Бүгін, 22 қазанда, «Балуан Шолақ» атындағы спорт сарайында ширек финалға жолдама беретін жекпе-жектер өтеді.

Күндізгі көрсетелімде 60, 81 және 91 келіден жоғары салмақтағы боксшылар шаршы алаңға көтеріледі.

60 келіде Берік Әбдірахманов екінші жұпта рингке шығады. Оның қарсыласы - Роберт Харутюнян (Германия).

81 келіде Әділбек Ниязымбетов бесінші жұпта Косова боксшысы Арменд Хохаймен жұдырықтасады.

Он екінші жұпта аса ауыр салмақтағы Иван Дычко (+91 келі) алғашқы жекпе-жегін өткізеді. Оның қарсыласы – Иштван Бернадт (Венгрия).

Кешкі көрсетілімнің екінші жұбында Ілияс Сүлейменов (52 келі) қырғыз боксшысы Азат Үсенәлиевпен жекпе-жекке шығады.

Ұлттық құраманың капитаны Данияр Елеусінов (69 келі) жарыс күнін қорытындылайды. Оның 1/8 финалындағы қарсыласы – Сулеймани Сиссоко (Франция).

Естеріңізге сала кетейік, кеше қазақстандық 4 боксшы ширек финалға шыққан еді. Олар – Біржан Жақыпов (49 келі), Қайрат Ерәлиев (56 келі), Мерей Ақшалов (64 келі), Жәнібек Әлімханұлы (75 келі).

Өкінішке қарай, 91 келіде жұдырықтасқан Антон Пинчук ширек финалға өте алмады. Ол өзбекстандық боксшы Рустам Тулалановқа есе жіберді.

Бүгінгі жекпе-жектерді «KAZsport» тікелей эфирде көрсетеді. Күндізгі көрсетілім 13:50-де, ал кешкі көрсетілім 18:50-де басталады.

Қазақ боксшыларының барлық жекпе-жектері туралы ақпараттарды, бейнежазбаларды kazsporttv.kz сайтынан көре аласыздар.