8 боксшымыз Әлем біріншілігінің жартылай финалында

8 боксшымыз Әлем біріншілігінің жартылай финалында

Бокстан өтіп жатқан әлем чемпионатында жүлдеге іліккен 40 спортшының есімі белгілі болды. Олардың арасында Қазақстанның 8 бірдей боксшысы бар. Яғни қоржынымызда кем дегенде 8 жүлде.  Кеше өткен ширек финалдық жекпе-жектердің шымылдығын 49 келідегі Біржан Жақыпов пен пуэрторикалық Энтони Ривера түрді. Алғашқы раундтан бастап, жекпе-жек тізгінін қолға алған жерлесіміз қарсыласына еш мүмкіндік қалдырмады. Жақыповтың  жартылай финалдағы қарсыласы кубалық Иосвани Вейтиа болмақ.

Жеңіске деген құлшыныс Қайрат Ерәлиевті жартылай финалға алып шықты. Қайрат Лондон олимпиадасының чемпионы кубалық Робейси Карразананы жолдан ығыстырды. Ол енді әзірбайжандық Жавид Чалабиевпен финалға берілетін жолдаманы сарапқа салады.

Жерлестерімізден үшінші болып шаршы алаңға Мерей Ақшалов көтерілген-тін . Қарсыласы тәжірибелі қырғыз спортшысы Ермек Сакенов болды. Үш раунд бойы белсенді қимылдаған Мерейдің жеңісіне ешкім күмән келтірмеді. Мерей үшін ендігі белес – бразилиялық Эвертон Попес.

Алдыңғы екі жекпе-жегін жарқын жеңіспен аяқтаған Жәнібекке ширек финалды  бағындыру өте қиын болды. Румыниялық    Богдан Хуратони де оңай шағылар жаңғақ емес екен. Дегенмен сәттілік Жәнібекке серік  болды. Жерлесіміздің келесі қарсыласы ағылшын боксшысы Энтони Фаулер.

Ал Ілияс Сүлейменов Эндрю Селбиге есе жіберді. Лондонда дәл осы британ боксшысы Ілиястың жолын кескен болатын.

Одан кейін 60 келіде өнер көрсеткен Берік Әбдірахманов венесуэлалық Диас Луисті үш раунд бойы шаршы алаңның ішінде қуалаумен болды. Осылайша 2-1 есебімен жеңіске жетіп, жартылай финал жолдамасын қалтасына салды.  Қарсыласы кубалық Лазаро Эстрада.

Құрама қапитаны Данияр Елеусінов италиялық  Винченцо Манджиакапреден Лондонда кеткен есені қайтарды. Енді Данияр жартылай финалда германиялық Араик Марутянмен жұдырықтасады.

81 келідегі Әділбек Ниязымбетов пен аса ауыр салмақтағы Иван Дычкоға жартылай финал жолдамасы оңай уыстарына түсті. Әділбек үнді боксшысы Сумита Сангванды жеңіл тізе бүктірсе, Дычконың қарсыласы жарақатына байланысты тіпті шаршы алаңға да көтерілмеді. Әділбек енді өзбек боксшысы Ойбек Мамазулуновпен қайта қолғап түйістіреді. Дычконың қарсыласы неміс Эрик Пфейфер. Біріншілік бағдарламасына сәйкес бүгін демалыс болғандықтан, жартылай финал бәсекелері ертең жалғасатын болады. Ол жекпе-жектерді де сіздер «KAZsport» телеарнасынан тамашалай аласыздар.