Мен үшін Олимпиада ойындары аса маңызды - Алексей Полторанин
Шаңғы жарысынан Қазақстан құрамасының көшбасшысы Алексей Полторанин бұл маусымда жанкүйерлерін бірнеше рет қуантты. Ол Әлем Кубогы кезеңдерінде үш рет күміс жүлдені еншіледі.
Шаңғышы бұл маусымдағы алғашқы жүлдесін Норвегияның Лиллехаммер қаласында өткен кезеңде 15 шақырымға созылған жарыса иеленді. Ал тағы екі күмісті Италияның Азиаго қаласында өткен жарыста жеңіп алды. Алдымен жекелей спринтте мәре сызығын екінші болып кесті. Командалық жарыста Николай Чеботькомен бірігіп, тағы бір күмісті қанжығасына байлады.
Sports.kz интернет-порталына берген сұхбатында Алексей Полторанин алдағы Сочи Олимпиадасының жоспарларымен бөлісті.
«Tour de Ski» кезеңінде ұпай жинау үшін жарыс жолына шығамын. Бұл кезең мен үшін дайындықты пысықтау болмақ. Басты қарсыласым, ресейлік Александр Легков. Мен үшін Олимпиада ойындары аса маңызды», - деді шаңғышы Алексей Полторанин.
