Полторанин үмітті ақтайды – В.Смирнов

Қазақстандықтар Сочи Олимпиадасынан шаңғышы Алексей Полтораниннен жүлде күтеді. Оны атақты шаңғышы, 1994 жылғы Лиллехаммер Олимпиадасының чемпионы, Олимпиада ойындарының төрт дүркін күміс және екі дүркін қола жүлдегері Владимир Смирновтың ізбасары санайды.

Атақты спортшы Владимир Смирнов Олимпиада ойындарындағы Алексей Полтораниннің мүмкіндігін бағалады.

«Алексей алыс қашықтықта өзін жақсы сезінеді. Өткен жылы Әлем чемпионатының «қоласын» жеңіп алып, дәлелдей түсті. Дегенмен Әлем Кубогы кезеңдерінің нәтижесі бойынша қарасақ, оның ең жақсы көретін қашықтығы – 15 шақырымды классикалық әдіспен жүру. Бұл жерде барлық мүмкіндігін пайдалану керек», - дейді Владимир Смирнов.

Атақты шаңғышының сөзінше, Алексей Полторанин скиатлон жарысына шаңғының жылдамдығын сезіну үшін қатысқан. Ол үшін ең маңызды жарыс – 15 шақырымдық классикалық стиль мен аралас эстафета.

Айта кетейік, 14 ақпан күні 16:00-де Алексей Полторанин 15 шақырымдық классикалық стильде жарыс жолына шығады.