«Қазақстан» Ұлттық телеарнасы футболдан Әлем чемпионатының 33 ойынын тікелей эфирде көрсетеді
Бүгін Астанадағы «Қазмедиа орталығында» «Қазақстан», «КAZsport» және «Еуразия» Бірінші арнасы телеарналарының Қазақстан аумағында футболдан 2014 жылғы Әлем чемпионаты ойындарын трансляциялауына қатысты баспасөз конференциясы өтті.
Оған «Қазақстан» РТРК» АҚ Басқарма төрағасы Нұржан Мұхамеджанова, «КAZsport» телеарнасының директоры Диас Ахметшәріп, «Еуразия» Бірінші арнасының өкілі Осадчук Юлия, сондай-ақ, футболдан Әлем чемпионатына баратын аккредиттелген комментаторлар мен журналистер қатысты.
«Енді бір айдан кейін біздің телеарналар жанкүйерлерге бір айға созылатын мереке сыйлатын болады. Футболдан Әлем чемпионаты ойындарын көрсету - еліміз үшін айтулы шара», деді баспасөз барысында сөз алған басқарма төрайымы Нұржан Мұхамеджанова.
«Қазақстан» Ұлттық телеарнасы 33 ойынды тікелей эфирде көрсетуді жоспарлап отыр. Ал «KAZsport» телеарнасы чемпионаттың барлық 64 ойынын көрсетеді. Оның ішінде 32 матч тікелей эфирде жүргізіледі. Сонымен қатар, ашылу және жабылу салтанатын да көрермендер тікелей эфирде тамашалай алады.
