Футболдан 2014 жылғы Әлем чемпионатына баратын қазақстандықтар үшін жадынама жасалды
Бразилияның өзіне тән ерекшелігін, соның ішінде елдегі криминогендік жағдайды ескере отырып, ҚР Индустрия және жаңа технологиялар министрлігінің Туризм индустриясы комитеті ҚР Сыртқы істер министрлігімен бірлесе отырып, 2014 жылғы футболдан Әлем чемпионатына баратын қазақстандық туристер үшін жадынама әзірледі, деп хабарлады ҚазАқпарат.
Осы жылғы 12 маусым мен 13 шілде аралығында Бразилияда 2014 жылғы футболдан Әлем чемионаты өтеді. Әлем чемпионаты-2014 ойындары 12 бразилиялық қалада жүргізіледі, олардың көпшілігі бір-бірінен едәуір қашықта.
Қолында билеті бар немесе билет сатып алатыны туралы қуаттау қағаздары бар адамдар қарапайым тәртіппен визаға өтініш береді. Олар үшін өтінімдерді қараудың басымдықты тәртібі және консульдық алымдардан босату көзделген.
Турнир матчтары мына стадиондарда өтеді: Ұлттық стадион (Бразилиа, Федеральдық округ), Минейран (Белу-Оризонти, Минас-Жераис штаты), Арена Пантанал (Куяба, Мату-Гроссу штаты), Арена Байшада (Куритиба, Парана штаты), Кастелан (Форталеза, Сеара штаты), Амазония (Манаус, Амазонас штаты), Арена дас Дунас (Натал, Риу-Гранди-ду-Норти штаты), Бейра-Рио (Порту-Алегри, Риу-Гранди-ду-Сул штаты), Пернамбуку аренасы (Ресифи, Пернамбуку штаты), Маракана (Рио-де-Жанейро, Рио-де-Жанейро штаты), Фонте-Нова (Салвадор, Баия штаты), Арена Коринтианс (Сан-Паулу, Сан-Паулу штаты).
Бразилия үкіметі мен ФИФА Атқару комитеті арасындағы уағдаластыққа сәйкес 2014 жылғы Әлем чемионаты жеке іс-шара ретінде ғана қарастырылады.
Спорттық жарыстарды ұйымдастырумен, билеттерді сату және таратумен, ӘЧ-2014 шараларын медиалық жариялаумен байланысты басқа да барлық мәселелер ФИФА құзыретіне жатады.
Шығу режимі
Бразилияға баратын Қазақстан азаматтары үшін туристік виза рәсімдеу қажет. Визаны рәсімдеу мерзімі - құжаттарды тапсырған сәттен бастап - 14 күн.
Сондай-ақ жадынамада Туристік виза алу үшін құжаттар тізімі, Куритиба қаласы әуежайының жұмыс режимі, санитарлық-эпидемиялық талаптар, консульдық сұрақтар қарастырылған.
Толық мәліметтерді ҚР Индустрия және жаңа технологиялар министрлігінің Туризм индустриясы комитетінің сайтынан алуға болады.
