Бүгін - мадридтік дерби!
Бүгін Зинедин Зидан жаттықтыратын «Реал» мадридтік «Атлетико» клубымен кездеседі. Футболдан Испания чемпионатының 12-ші тур аясындағы матч «Атлетиконың» «Висенте Кальдерон» стадионында өтпек. Екі мадридтік команда арасындағы дербиді «Kazsport» телеарнасы тікелей эфирде көрсетеді.
Бұл екі футбол алыптарының арасындағы соңғы кездесу - Миланда өткен 2016 жылғы УЕФА Чемпиондар лигасының финалы. Естеріңізде болса, финалда «Реал» матч соңындағы пенальти арқылы жеңіске жеткен еді. Бірақ, мадридтік «Атлетико» соңғы рет өз алаңында «Реалға» 2013 жылдың сәуірінде жол берген болатын.
Кездесуге алаң иелері классикалық 4-4-2 сұлбасымен шығуы ықтимал. «Атлетиконың» бас бапкері бұл сұлбаны өте жиі қолданады. Ал, атақты Зизу болса, кең танымал 4-2-3-1 сұлбасын қолданбақ. «Реалдың» шабуылшылары Альваро Мората мен Кәрім Бензема жарақаттарынан айығып үлгермегендіктен француздық бапкер центрфорвард ретінде португалиялық шабуылшы Криштиану Роналдуды шығаруы мүмкін.
Осы маусымда Ла лигада бірде-бір испаниялық командадан жеңіліп көрмеген «Корольдік клуб» пен қайтпайтын «Атлетико» арасындағы мадридтік дербиді «Kazsport» телеарнасынан тамашалаңыздар. Трансляцияның басталуы қарашаның 19-ынан 20-сына ауған түні 01:45-де. Сондай-ақ, kazsport.kaztrk.kz сайттында онлайн-көрсетілім жүргізіледі.
