«Kazsport» телеарнасы «Севилья» - «Валенсия» кездесуін тікелей эфирде көрсетеді

Қарашаның 26-сынан 27-сіне ауған түні  футболдан Испания чемпионатының 13-ші туры аясында Хорхе Сампаоли бастаған андалусиялық «Севилья» итальяндық бапкер Чезаре Пранделли қарамағындағы «Валенсия» клубымен кездеседі. Ойын «Севильяның» «Рамон Санчес Писхуан» стадионында өтеді. 

Осы маусымда  Хорхе Сампаолидің шәкірттері жақсы өнер көрсетуде. Олар 12 турда 24 ұпаймен «Реал» мен «Барселонаны» ғана алға жіберіп, турнирлік кестеде үшінші келе жатыр. Андалусиялық кулб өз алаңында 5 рет жеңіске жетіп, тек қана қаһарлы «Барселонаға» ғана есе жіберген. 

Ал, «Валенсия» осы маусымда нашар көрсеткіштерге ие. «Валенсия» 11 ұпаймен 16-орында. Қазіргі бапкері Чезаре Пранделли команданы қазан айынан бастап жаттықтыруда. 

Командалар арасындағы соңғы кездесу 10 сәуірде «Валенсияның» «Месталья» стадионында өтіп, 2:1 есебімен жергілікті ұжымның пайдасына аяқталды.

Естеріңізге сала кетейік, «Севилья» - «Валенсия» кездесуін тікелей эфирде «Kazsport» телеарнасынан көре аласыздар. Трансляция басталуы 01:40-та. Сондай-ақ, kazsport.kaztrk.kz сайтында онлайн-көрсетілім жүргізіледі.