«Севилья» «Сельтаны» Висенте Иборраның хет-тригі арқасында жеңді
Футболдан Испания чемпионатының 15-туры аясында андалусиялық «Севилья» сырт алаңда галисиялық «Сельта» клубына қарсы кездесу өткізіп, 0:3 есебімен жеңіске жетті.
Бірінші таймда екі команданың есепті ашуына куә бола алмадық. Бірақ, ойынның бірінші жартысы тартысты өтті.
Екінші таймда көптен күткен бірінші голды қонақтар салды. 51-ші минутта Пабло Сарабияның бұрыштамадан көтерген добын «Севильяның» ойыншысы Висенте Иборра басымен дәл қақпаға бағыттап, командасын алға шығарды – 0:1.
84-ші минутта Иборра «Сельтаның» орталық қорғаушыларының қателігін пайдаланып, есепті еселей түсті - 0:2.
Матчтың соңғы минутында Кабраль Корреаны өз айып алаңында шалып жығып, төреші 11-метрлік айыпдобын белгілейді. Ал, Висенте Иборра пенальтиді дәл орындап, кездесудегі хет-трик авторы атанды - 0:3.
Естеріңізге сала кетейік, «Сельта» - «Севилья» кездесуін тікелей эфирде көрсеткен «Kazsport» телеарнасы.
