Бекболат Тілеухан: «Нұрлы жолымыз» шынында нұрлы болғай
Бекболат Тілеухан, ҚР Ұлттық спорт түрлері қауымдастығының президенті:
Біз әлемдік қауымдастықтың бір бөлігі болғаннан кейін әлемде болатын әртүрлі дағдарыстың бізге салқыны тимей қалмайтындығын Елбасының аузынан естідік. Бірақ, сондай кезде елдің жұмыла білуі, «бір жағадан бас, бір жеңнен қол шығара білуі» - біздің келешегіміз үшін аса маңызды, ұрпақ алдындағы үлкен міндетіміз.
Осындай кезеңде дәуірдің талабына орай, Жолдаудың Елбасымыздың аузынан шығуы уақыт қажеттілігі. Қашанда жарық шашқан, жылу шашқан нәрсені қазақ нұр деп айтады. Нұрдың эпицентрі осы кезде Астана. Бұл тәуелсіздіктің символы, бейнесі іспетті нәрсе.
Жолдаудың «Нұрлы жол» деп аталуының өзінде үлкен мән бар. Қашанда нұрға, нұрлы нәрсеге біздің қазақта құрмет болған. Нұрға жылынғанбыз, нұрдың маңында топтасқанбыз. Ендеше осы «Нұрлы жолымыз» шынында да нұрлы болғай.
