Бокстан Қазақстан әйелдер құрамасы халықаралық турнирде топ жарды

Сербияның Сомбор қаласында әйелдер боксынан «Ұлттар кубогы» халықаралық турнирі мәресіне жетті. Аталған сында Қазақстан құрамасы 5 алтын, 1 күміс және 5 қола медаль жеңіп алды.

Жарыс қорытындысы бойынша Алуа Балқыбекова (48 келі), Ангелина Лукас (51 келі), Дина Жоламан (54 келі), Римма Волосенко (60 келі) және Ләззат Күнгейбаевалар (+81 келі) чемпион атанды.

51 келідегі чемпиондық атақ үшін қос қазақстандық боксшы таласты. Әлем чемпионы Назым Қызайбай тағы бір қазақстандық спортшы Ангелина Лукасқа есе жіберді.

Турнирдің үздік боксшысы атағын Римма Волосенко иеленді.

Қазақстан құрамасы жалпы командалық есепте көш бастаса, үздіктер қатарын Ресей мен Сербия боксшылары түйіндеді.

Естеріңізге сала кетейік, Сербиядағы «Ұлттар кубогы» халықаралық турниріне әлемнің 20 мемлекетінен 170 спортшы қатысқан болатын.

Фото: Сергей Штрак