Қазақстан құрамасы бокстан Азия чемпионатында 2 алтын, 2 күміс, 7 қола жүлде еншіледі
Таиландтың Бангкок қаласында бокстан Азия чемпионаты өз мәресіне жетті. Биылғы құрлықтық додаға Азияның 39 елі қатысып, Қазақстан құрамасы жалпы командалық есепте 2 алтын, 2 күміс, 7 қола жүлдемен екінші сатыдан көрінді.
Құрама сапынан 75 келіге дейінгі салмақта бақ сынаған Тұрсынбай Құлахмет пен 81 келіге дейінгі салмақта сынға түскен Бек Нұрмағанбет жеңімпаз атанса, Закир Сафиуллин (60 келі) мен Қамшыбек Қоңқабаев (91 келіден жоғары) күміс медаль еншіледі.
Ал, Василий Левит (91 келі), Санатәлі Төлтаев (64 келі), Теміртас Жүсіпов (49 келі), Милана Сафронова (64 келі), Дариға Шәкімова (69 келі), Фариза Шолтай (81 келі) және Ләззат Күнгейбаева (81 келіден жоғары) қола жүлдені қанағат тұтты.
Фото: Қазақстандық бокс федерациясы
