"Челси" Еуропа лигасының жеңімпазы атанды
Баку қаласында өткен финалда лондондық "Челси" клубы "Арсеналды" 4:1 есебімен ұтып, Еуропа лигасының жеңімпазы атанды.
Алғашқы таймда қос команда бірнеше қауіпті сәттер жасағанымен, ойында есеп ашылмады. Ал екінші кезең бастала салысымен "зейнеткерлер" есеп ашты. Ойынның 49-минутында "Челси" шабуылшысы Оливье Жиру мергендігімен көзге түсіп, өз командасын алға шығарды. Ал 60-минутында оның әріптесі Педро Родригес есепті үстемелей түсті. Араға 5 минут салып "Арсенал" қақпасына пенальти белгіленді. 11 метрлік айып добын Эден Азар мүлтіксіз орындады. Бұдан кейін "Арсенал" ойыншылары алға ұмтылды. Олардың қатарынан 69-минутта Алекс Ивоби есеп айырмасын қысқартқан еді. Алайда 72-минутта Эден Азар дубль авторы атанып, ойынға нүкте қойды.
Осылайша "Челси" тарихында екінші рет Еуропа лигасын жеңіп алды.
