Бокстан Токио Олимпиадасына іріктеу кезеңі қай уақытта өтеді?

Халықаралық Олимпиада комитеті бокстан 2020 жылғы Токио ойындарына іріктеу кезеңі өтетін мерзімді атады.

ХОК мәлімдесіне сәйкес, 2020 жылдың қаңтары мен сәуірі аралығында Азия/Океания аймағында іріктеу сыны өтеді.

Сондай-ақ, келесі жылдың мамыр айында өтетін әлем чемпионатында Олимпиада ойындарына лицензия алуға болады. Жалпы алғанда, Токио ойындарына жолдама тарататын төрт турнир ұйымдастырылады. 

ХОК бокстан Олимпиада бағдарламасына енетін салмақ дәрежелерін де анықтады. Жапония астанасында өтетін Олимпиадада ерлер арасында 8 салмақта медальдар сарапқа салынса, әйелдер 5 салмақ дәрежесінде бақ сынайды. 

Ерлер арасындағы олимпиадалық салмақ дәрежелері: 52 келіге дейін, 57 келіге дейін, 63 келіге дейін, 69 келіге дейін, 75 келіге дейін, 81 келіге дейін, 91келіге дейін, +91 келі.

Әйелдер арасындағы олимпиадалық салмақ дәрежелері: 51 келіге дейін, 57 келіге дейін, 60 келіге дейін, 69 келіге дейін, 75 келі. 

Дереккөз: ҚР ҰОК