Нұр-Сұлтандағы "М-1 Challenge-105" турнирін "QAZSPORT" тікелей эфирде көрсетеді
19 қазан күні елордада аралас жекпе-жектен "М-1 Challenge-105" турнирі өтеді. Аталмыш жекпе-жек кешінде қос бірдей чемпиондық атақ үшін кездесулер өтеді. Кештің басты бәсекесінде жеңіл салмақтағы М-1 чемпионы отандасымыз Сергей Морозов пен америкалық Джош Реттингхаус рейджке шығады. 2016 жылы екі спортшы айқасқа түсіп, америкалықтың жолы болды. 1-раундтың 5-ші минутында отандасымызды нокаутқа түсірген болатын. Жерлесіміз жергілікті жанкүйерлерінің алдында 3 жыл бұрын кеткен есесін қайтарады деп сенеміз.
M-1 Global тұжырымының уақытша чемпионы атағы үшін қазақ батыры Ассу Алмабаев тәжірибелі спортшы Крис Келадеспен сынға түседі. Арман Әшімов жарақатына байланысты бұл атақ үшін жұдырықтаса алмайды.
Сондай-ақ, дәл осы күні Азамат Марқабаев грузиялық Бека Гогаладземен күш сынасса, Жұман Жұмабеков қырғызстандық Руслан Құдайбердиевпен айқасқа түседі.
Исатай Теміров ресейлік Данила Приказамен кездеседі. Оның қарсыласы Данила Приказаның өткен жолғы Қазақстандағы жорығы сәтсіз аяқталды. Жеңілмеген қазақ спортшысы Шавкат Рахмоновтан жеңілген еді.
Сонымен қатар Нұр-Сұлтандағы жарыста Сәбит Жүсіпов пен Абылайхан Қадыржан кезекті жекпе-жектерін өткізеді.
19 қазан күні өтетін турнир ресейлік промоушен үшін соңғы 12 айда Қазақстан аумағында ұйымдастырған 4-ші жарыс болмақ.
