Конфедерация кубогінде кімдердің бағы жанды?

Алматыдағы Балуан Шолақ спорт сарайында бокс, күрес түрлері, дзюдо, таеквондо, карате және қазақ күресінен 2019 жылғы Конфедерация кубогінің жеңімпаздары анықталды. 

Боксшылар бәсекесінде Түркістан облысының былғары қолғап шеберлері топ жарды. Оңтүстіктік боксшылар финалда елордалықтарды 5:3 есебімен жеңді.

Грек-рим күресінде шымкенттік балуандардың бағы жанды. Олар шешуші бәсекеде Алматы облысынан басым түсті.

Каратэшілер сынында Алматы қаласы көш бастады. Ақтық сында Маңғыстау облысының спортшыларын 3:2 есебімен жеңіп, Конфедерация кубогінің 2019 жылғы жеңімпазы атанды. Естеріңізге сала кетейік, бұл жекпе-жек түрін меңгергендер аталмыш додаға алғаш рет қатысты. 

Таеквондошылар бәсекесінде де алматылықтарға тең келер ешкім болмады. Олар финалда Алматы облысының командасын 89:73 есебімен ұтты. 

Қазақ күресінен Солтүстік Қазақстан облысының намысын қорғайтын «Қызылжар Арландары» клубы Конфедерация кубогінде жеңіске жетті. 

Жылдағы дәстүр бойынша, Конфедерация кубогін дзюдошылар додасы аяқтады. Татами төрінде Шығыс Қазақстан спортшылары ешкімге дес бермеді. Олар финалдық бәсекеде ақтөбеліктермен кубокке таласқан болатын. Финалда ШҚО өкілдері 4:2 есебімен айқын басымдықпен жеңіске жетті.

Жарыс соңында спортшылар арнайы сыйлықтармен марапатталды.