Зальцбургтегі ойын қалай аяқталады?
10 желтоқсан күні УЕФА Чемпиондар лигасы топтық кезеңінің соңғы турында «Зальцбург» өз алаңында «Ливерпульді» қабылдайды. «Ред Булл Аренасында» өтетін ойынды сағат 23:45-тен бастап тікелей эфирде көре аласыздар.
Ағылшын жеріндегі матч 4:3 есебімен алаң қожайындарының пайдасына шешілді. Алайда австриялық клуб оңай шағылатын жаңғақ еместігін аңғартты. Бұл топта сенсация орын алуы ғажап емес. Аталмыш турнирдің плей-офф кезеңіне жолдама алатын командалар мен Еуропа лигасына аттанатын клуб әлі анықталған жоқ.
Австриялық ұжым 5 турдан кейін 7 ұпай жинап, ІІІ орында келеді. Джесси Марш шәкірттері 5-турда бельгиялық «Генкті» 4:1 есебімен ойсырата ұтты. Топтағы басты қарсыласы «Наполиге» алғашқы ойында есе жіберіп, жауапты кездесуде тең ойнады.
Чемпиондар лигасының өткен маусымдағы чемпионы «Ливерпуль» 10 ұпаймен көш басында келеді. Анчелотти ойыншыларынан 1 ұпай, ал «Зальцбургтен» 3 ұпай ғана алда келеді. Алайда Клопп ойыншылары италиялық «Наполимен» өткен қос ойында да ұпай жоғалтты. Алғашқы кездесуде ұтылып, 5-турда тең түсті.
Өткен жылы да «Ливерпуль» топтық кезеңде бірқатар қиындыққа тап болды. Алайда Алиссон мен Салах сынды ойыншылардың шеберлігі Клоппқа плей-офф жолдамасын алып берді.
Е квартетінде қай команда топ жарады? Сенсация орын алуы мүмкін бе? Клопп алғашқы минуттан алаңға кімдерді шығарады? Чемпиондар лигасындағы тұңғыш америкалық бапкер Джесси Марш жергілікті жанкүйерлерді қуанта ала ма?
Қызыққа толы тартысты кездесуді 10 желтоқсан күні сағат 23:45-тен бастап «QAZSPORT» телеарнасынан көріңіздер.
