СӘКЕН БИБОСЫНОВ ХАСАНБОЙ ДУСМАТОВТЫ ЖЕҢДІ!

Токио Олимпиадасының қола жүлдегері Сәкен Бибосынов бокстан Белградта өтіп жатқан Әлем чемпионатының алғашқы жекпе-жегінде Олимпиада чемпионы Хасанбой Дусматовтан басым түсті. Түркістан бокс мектебінің түлегі қарсыласын 5:0 есебімен жеңді. Ескере кететін жайт, жекпе-жек аяқталысымен өзбек тарапы аппеляциялық қарсы шағым түсіргенімен, төрешілер алқасы шешімдерімен өзгерткен жоқ.

- Мен бұл додаға өте жақсы дайындалдым. Олимпиададағы қоланың орнын толтырғым келеді. Белградқа алтын үшін келдім. Бапкерлік құрамға жеңіске жету жолындағы көмектері үшін алғысымды білдіремін, - деді жекпе-жектен кейін Сәкен Бибосынов.

Енді 1/8 финалда 24 жасар былғары қолғап шеберіміз үндістандық Дипакпен кездеседі. Ол алғашқы жекпе-жегінде қырғызстандық Азат Үсеналиевтен айла асырған.

Бибосынов пен Дусматов жекпе-жегі кешкі сессияның шымылдығын түрсе, бесінші болып шаршы алаңға 75 келідегі Нұрқанат Райыс шықты. Белград төріндегі алғашқы жекпе-жегінде 21 жасар отандасымыз черногориялық Стефан Савковичты жеңді. Екінші айналымдағы қарсыласы молдовалық Влад Гаврилыч. 

Бокссүйер қауым жекпе-жектерді «Qazsport» арнасының тікелей эфирінде көре алады. Күндізгі сессия елорда уақытымен 17:00-де басталса, кешкі сессия 22:00-ге жоспарланған.

Жігіттерімізге бірге қолдау көрсетейік!