«AUSTRALIAN OPEN» турнирінде Қазақстандық теннисшілердің қарсыластары белгілі болды
Теннистен маусымдағы алғашқы Үлкен Дуылға турнирі Мельбурн (Аустралия) қаласында өтеді. Байрақты бәсекеде қазақстандық теннисшілердің алғашқы қарсыластары белгілі болды. Жеребенің нәтижесінде ерлер арасында сынға түсетін Александр Бублик квалификация жеңімпазымен кездессе, Михаил Кукушкин, Дмитрий Попко және Тимофей Скатов ертең іріктеу кезеңінің финалында өнер көрсетеді.
Жарысқа әлемнің бірінші ракеткасы Новак Джокович қатысатынын айта кетейік. Осыған дейін серб теннисшісі Аустралиядағы теннис турниріне қатыспайды деген ақпарат шыққан болатын.
Әйелдер арасында Қазақстанның бірінші ракеткасы Елена Рыбакина алғашқы айналымда қазақстандық Зарина Дияспен кездеседі. Турнирге қатысып жатқан отандасымыз Юлия Путинцеваның қарсыласы Армони Тан. (Франция) «Australian Open» турнирі 17-30 қаңтар аралығына жоспарланған.
