«Astana Open» турнирінің алғашқы жарыс күнінің қорытындысы
Бүгін Астана қаласында өтіп жатқан АТР 500 санатындағы «Astana Open» турнирінің негізгі кезеңі басталады.
Турнир ұйымдастырушылары тарапынан wild card алған жерлесіміз Бейбіт Жұқаев Нидерланд елінің өкілі Ботик Ван Де Заншульпке (#34) есе жіберді. Есеп: 6:1, 6:1.
«Grand Slam» турнирінің үш дүркін жеңімпазы Станислас Вавринка (Швейцария) француз Адриан Маннариномен (#51) кездесіп, 1:6, 6:2, 6:3 есебімен жеңілді. Осылайша, Вавринка жарыс жолын аяқтады.
Польшалық Хуберт Хуркач (#10) аргентиналық теннисші Франсиско Черундолоны 6:2, 7:6 (2) жеңіп, екінші айналымға жолдама алды.
Жарыстың бірінші күні алғашқы сенсация тіркелді. Негізгі кезеңге іріктеу арқылы жолдама алған қытайлық Чжан Чжичьжень әлемнің 39-шы ракеткасы Аслан Карацевті (Ресей) 2 сағат 25 минуттың ішінде 4:6, 6:4, 6:1 есебімен тізе бүктіріп, келесі кезеңге шықты.
Сәлден соң елорданың орталық кортына канадалық Феликс Оже-Альяссим (#13) Роберто Баутиста-Агутпен (#21) (Испания) шеберлік байқасады.
Сонымен қатар, кешкі сессияда Андрей Рублев (#9) (Ресей) және Ласло Дьере (#76) кездесуі жоспарланған.
Ертеңгі екінші жарыс күнінде: Карлос Алькарас, Новак Джокович, Даниил Медведев және Александр Бублик өнер көрсетеді.
«Astana Open» АТР 500 турнирінің барлық ойындарын 9 қазанға дейін «Qazsport» телеарнасы және qazsporttv.kz сайтынан тамашалай аласыздар.
