Нұрқанат Серікбаев Ташкенттегі Grand Slam додасының финалына шықты

Өзбекстан астанасы Ташкент қаласында өтіп жатқан Grand Slam жарысының алғашқы күні ұлттық құрама дзюдошылары үшін сәтті өтіп жатыр.

60 келі салмақта белдескен Нұрқанат Серікбаев жартылай финалдық белдесуде 2019 жылғы Әлем Чемпионы грузиялық Лухуми Чхвимианиді жеңіп, ақтық сынға жолдама алды. Ұлттық құрама мүшесі ширек финалда татами қожайыны Дильшодбек Баратовты жеңді.

Нұрқанаттық финалдағы қарсыласы Ким Вон Джин (Оңтүстік Корея). Финалдық белдесулер Астана уақытымен сағат 18:00-де «Qazsport» телеарнасының тікелей эфирінде басталады.  

60 келіде белдескен тағы бір отандасымыз Мерей Марханбетов алғашқы айналымнан аса алмады. Сонымен қатар, әйелдер арасында сынға түскен Ғалия Тынбаева (48 келі), Бақыт Құсақбаева (57 келі) және Балнұр Құрманбай (57 келі) іріктеу белдесулерінде жеңіліп, жарыс жолын аяқтады.