Соперником «Актобе» в плей-офф Лиги Европы - киевское «Динамо»
Еурокубоктарда ел намысын абыроймен қорғап жатқан «Шахтер» мен «Ақтөбенің» келесі қарсыластары белгілі болды. Ньон қаласында тартылған соқыр жеребенің нәтижесі қос командамызды да азулы клубтармен түйістірді. Кеншілер Чемпиондар лигасының төртінші іріктеу кезеңінде шотландиялық «Селтикпен» кездеседі. Қазақ футболы тарихында, бұрын соңды болмаған жетістікке қол жеткізген қарағандының Шахтері, «Селтиктен» сескенбейді. «Батэні» жолдан тайдырған көмірлі өлке футболшылары шотландиялықтарды да аяқтан шаламмақ. Алғашқы ойын 20-шы немесе 21-ші тамызда Астанада өтсе, қарымта матч бір аптадан соң Шотландияда ойналады.
Ал, ақтөбеліктер Еуропа лигасының плей-офф сатысында Киевтің «Динамосымен» жасыл алаңға шығады. Украинаның аңызға айналған командасының КСРО тұсында, алматының «Қайратымен» талай мәрте текетірескені жанкүйерлер жадынан кете қоймаған болар. Енді міне Қазақстандық жанкүйерлер «Динамоның» ойынын Ақтөбемен өтетін бәсекелерде тамашалайтын болады. Алғашқы ойын 22 тамызда Ақтөбеде, ал жауапты кездесу араға бір апта салып Киевте өтеді.
