Жансай Смағұлов – Әлемдік Гран-Придің күміс жүлдегері
Португалияның Алмада қаласындағы дзюдодан Гран-Придің екінші күн Қазақстан құрамасының қоржынына күміс жүлде түсті.
73 келіге дейінгі салмақта бақ сынаған Жансай Смағұлов финалда өзбекстандық Обидхон Номоновтан жеңілді.
Жансай Смағұлов іріктеу кезеңінде алдымен швед Олоф Хермодссонды, украиналық Владислав Казимировты екінші, бельгиялық Йерун Кассені үшінші айналымда жеңген. Ал жартылай финалда испаниялық Хосе Антонио Аранданың жауырынын жерге тигізіп, ақтық бәсекеге жолдама алды.
Осы салмақтағы тағы бір қазақстандық Аңсарбек Ғайнуллин гамбиялық Фэй Нджиді (шидо санымен) және португалиялық Саба Данелияны ұтқанымен, әзірбайжандық Нұрлан Османовқа есе жіберді. Барлығы 73 келіге дейінгі салмақта 60 дзюдошы сынға түсті.
Сондай-ақ бүгін татамиге шыққан Дана Әбдірова мен Севара Нышанбаева (57 келі), Абылайхан Жұбаназар, Бекәділ Шаймерденов (81 келі), Самалай Ерғалиева мен Эсмигүл Куюлова (63 келі) іріктеу белдесулерінен аса алмады.
Қазақстан құамасы жалпы есепте 1 алтын және 2 күміс медальмен екінші орында тұр.
Португалиядағы жарыста әлемнің 81 елінен келген 550-ге жуық дзюдошы рейтингтік ұпайларды сарапқа салып жатыр.
