Astana Motorsports командасының мүшелері «Дакардың» 10-шы кезеңін аяқтады
Қазақстандық Astana Motorsports командасының жүргізушілері Калама мен Сальта қалалары арасында өткен 10-шы кезеңді сәтті аяқтады. Жарыс жолының 350 шақырымы арнайы аймақ болды, деп хабарлайды Astana Motorsports баспасөз қызметі.
Айдын Рақымбаев басқаратын MINI жол талғамайтын көлігі кезеңді 20-шы орында аяқтаса да, жалпы есепте 10-шы орынды сақтап қалды.
«Жарыс биіктікте өтті. Мұндай ралли-марафонда болмаған шығар. Бүгінгі максимум – теңіз деңгейінен 4500 шақырым биіктік болды. Сондықтан қозғалтқыш барлық қуатында істей алмады. Соған байланысты, кезеңді кеш аяқтадық. Алайда, жалпы есептегі 10-шы орнымызды сақтап қалдық. Бәрінен бұрын ертеңгі күнді уайымдап отырмыз. Бізге көліктің тез жүргені керек», - дейді Айдын Рақымбаев.
Бауыржан Исабаев басқаратын Toyota Overdrive көліге де Айдын Рақымбаев айтқан қиындықтарға тап болды.
«Жалпы жақсы жүрдік, алайда көлігіміз биіктік кезінде дұрыс «тартпады». Бұралаң жолда баггиді оздық. Бірақ тегіс, тура жолда «моножетегі» бар көліктер бізді артқа тастап отырды. Сағатына 145 шақырым – бұл біздің бүгінгі кездегі ең жоғары жылдамдығымыз. Енді механиктер қарап көреді. Себебі, біздің қарқын көліктің мүмкіндігіне қарағанда әлдеқайда жоғары», - деп ойымен бөлісті Бауыржан Исабаев.
Б.Исабаев пен В.Демьяненко 10-шы кезеңдегі нәтижесі – кезеңде 24-ші, жалпы есепте – 17-ші орын.
Артур Ардавичус экипажы жүк көліктері арасындағы жарысты үздік ондыққа жақындап, 12-ші орында аяқтады. Ал, олардың жалпы есептегі нәтижесі – 22-ші орын.
«Бүгінгі кезең өте қиын болды. Көлікті 12 сағат жүргізіп, 360 шақырым арнайы аймақ еңсердік, сонымен қатар, адам шыдамас биіктік. Қозғалтқышқа оттегі жетпеді. Бұрылыста қуат керек, бірақ ол жоқ. Ал, кенет бұрылыстарда, әсіресе, таулы жерлерде бұл тіпті қауіпті болды. Мұндай қиындықтар барлық экипаждың басынан өтті. Адам ағзасы үшін де қиын соқты. Біз жарысты ерте бастадық. Қазір кеш, бірақ барлығы араласып кетті. Тек ұйықтап, дем алғымыз келіп тұр», деді «Дакар-2012» жарысының қола жүлдегері Артур Ардавичус.
Спортшылар 11-шы кезеңде Сальта мен Термас де Рио Хондо қалалары арасында жарысады. Жолдың жалпы ұзындығы 400 шақырымға жуық, ал оның 200 шақырымы «арнайы аймақ» болмақ.
