Шорт-трек. Абзал Әжғалиев жартылай финалда жарыс жолынан шықты
Оңтүстік Корея елінің Пхенчхан қаласындағы ХХІІІ Қысқы Олимпиада ойындарында шорт-тректен 500 метрлік қашықтықта ерлер арасындағы финалдық кезеңдер өз мәресіне жетті.
Аталған жарыстың ширек финалына құрама сапынан Абзал Әжғалиев, Денис Никиша, Нұрберген Жұмағазиев іріктеу сынынан сүрінбей өтіп, жолдама алған болатын.
Ширек финалдық сайыстардың қорытындысы бойынша Денис Никиша және Нұрберген Жұмағазиев сәтсіз өнер көрсетіп, жүлдеге таласу мүмкіндігінен қол үзді. Ал, Абзал Әжғалиев жартылай финалға өткенімен, қарсыластарына жол беріп, жарыс жолынын шығып қалды.
Сонымен қатар, командалық эстафетада 5000 метрлік қашықтық бойынша финалдық бәсекелер өз мәресіне жетті. 13-ақпан күні өткен іріктеу кезеңінде құрама жігіттері «В» финалдық тобына жолдама алған болатын. Жарыс қорытындысы бойынша Ақ Олимпиаданың шорт-тректен 5000 м эстафета сайыстарында Қазақстан құрамасы 6-орынға тұрақтады.