Төрешілердің намысына тиген боксшы жазаланатын болды

Халықаралық әуесқой бокс қауымдастығының (AIBA) Президенті Чинг-Куо Ву Рио-де-Жанейро Олимпиадасында төрешілерге қорлау мәніндегі әрекет жасағаны үшін ирландиялық боксшы Майкл Конланның жазаланатыны туралы мәлімдеді. «Конлан бірден төрешілерге ортаңғы саусағын көрсетті. ХОК бұл әрекетті тәртіпсіздік деп бағалады. Адамдардың намысына тиюге болмайды, олар ресми тұлғалар. Бұл әрекетімен ол өзін де ыңғайсыз жағдайға қалдырды. Осыдан кейін оған қатысты тәртіптік жазалар тағайындалады. Өзін лайықты деңгейде ұстаған жөн. Егер шешімге разы болмасаң, төрешілерді қорлауға болмайды. Бұл оны жазалағысы келіп жүргендердің назарына ілікті. Біз осы жағдайға байланысты тәртіптік комиссия құратын боламыз», - деді Ву. Естеріңізге сала кетейік, 56 келіге дейінгі салмақ дәрежесінде жұдырықтасатын ирландиялық Майкл Конлан төрешілердің шығарған шешіміне риза болмай, наразылық танытып, ортаңғы саусағын көрсеткен еді.