Сан-Маринодағы кездесуге санаулы күндер қалды

Осы сенбіде Михал Билек шәкірттері ЕУРО-2020 іріктеу турнирінің ең нашар командасы Сан-Мариномен кездеседі. Франко Варрелланың ойыншылары топтық кезеңдегі 8 ойының бәрінде ұтылып, өз қақпаларына 43 гол жіберген. Сан-Марино - аталмыш турнирде қарсыластарының қақпасынан саңылау таппаған жалғыз команда.

Қазақстан Ұлттық құрамасы Талғарда жаттығып жатыр. Абзал Бейсебеков сырқатына байланысты алдағы ойындарға қатыспайтын болғандықтан, құрамаға "Тобыл" ойыншысы Дмитрий Мирошниченко шақырылды.

Елордадағы ойында 4:0 есебімен жерлестеріміз жеңіске жетті. Сырт алаңда да Сан-Мариноны сан соқтырып, жанкүйерлерін қуантады деп сенеміз. Еуропа чемпионатына қатыса алмаса да, алдағы кездесулерде жеңіске жетуге үлкен мүмкіндік бар.

Сан-Марино мен Қазақстан арасындағы матчты 16 қараша күні сағат 22:50-ден бастап «QAZSPORT» арнасынан көре аласыздар!

Қазақстан құрамасына біздің арнамен бірге жанкүйер бол!

Фото: ҚФФ