Мейвезер мен Майдана тағы жұдырықтасады

37 жастағы америкалық боксшы Флойд Мейвезер-кіші 31 жастағы аргентиналық Маркос Майданамен қайта кездеседі. Бұл туралы Аllboxing.ru хабарлайды. Қазіргі таңда Флойд Мейвезер WBA және WBC тұжырымында орта салмақтағы Әлем чемпионы. Дүниежүзілік бокс кеңесі (WBC) Мейвезердің сұранысына оң жауабын берді. Бұл жекпе-жекте америкалық боксшы WBC және WBA (Super) тұжырымы бойынша орта салмақта және WBC тұжырымы бойынша бірінші орта салмақта чемпиондық атағын қорғайды. Мұндай жекпе-жек соңғы рет 1988 жылы Шугар Рэй Леонард пен Донни Лалоунд арасында болған. Сол кездесуде WBC тұжырымындағы Әлем чемпионы атағы бос болды. Айта кетейік, бұл жекпе-жек 13 қыркүйекте АҚШ-тың Лас-Вегас қаласында өтеді. Естеріңізге сала кетейік, Флойд Мейвезер мен Маркос Майдана мамыр айында жұдырықтасқан еді. Сол жекпе-жекте америкалық боксшы ұпай санымен жеңіске жетті.