Бүгін «Астана арландары» мен «Куба қабыландары» арасындағы алыптар айқасының екінші күнгі жекпе-жектері өтеді

Бүгін Астанадағы «Дәулет» спорт кешенінде Дүниежүзілік бокс сериясының үшінші және төртінші маусымының жеңімпаздары «Астана арландары» мен «Куба қабыландары» арасындағы жекпе-жектің екінші күнінде, екінші 5 салмақтағы боксшылар шаршы алаңға шығады. Бұл жекпе-жекті «KAZsport» телеарнасы тікелей эфирде сағат 20:00-де көрсетеді. Сонымен қатар, kazsporttv.kz сайтынан онлайн-трансляция жүргізіледі. Бүгін шаршы алаңға 52, 60, 69, 81, +91 келі салмақтағы бес жұп шығады. Мирас Жақыпов – Йосбани Вейтиа Сото (52). Роман Щегринов – Лазаро Альварес Эстрада (60). Мадияр Әшкеев – Рониэль Иглесиас Сотолонго (69). Хрвое Сеп – Хулио Сезар Ла Круз (81). Филипп Хргович – Йоанди Тойрак Ортега (+91). Бап пен бақтың сыналар сәтін «KAZsport» телеарнасынан тамашалаңыздар. Естеріңізге сала кетейік, кешегі жекпе-жекте 4:1 есебімен кубалық боксшылар жеңіске жеткен болатын.