«Астана» осы Еурокубок маусымында қанша табыс тапты?
Еуропа лигасының топтық кезеңіндегі екінші тур матчында «Астана» чехтің «Славия» командасымен тең ойнағаннан кейін, өз қазынасын 120 мың еуроға көбейтті.
Осылайша, «Астана» осы Еурокубок маусымында 6 миллион 300 мың еуро табыс тапты. Айта кетейік, Еуропа лигасында жеңіс үшін - 360 мың еуро, ал, тең ойынға - 120 мың еуро беріледі.
Еске сала кетейік, Чемпиондар Лигасының іріктеу кезеңінің екінші айналымында жеңіске жеткені үшін «Астана» 320 мың еуро табыс тапқан еді. Ал, іріктеу кезеңінен шыққаны үшін елордалық командаға үш миллион еуро беріледі. Сондай-ақ, ел чемпионы Чемпиондар Лигасына өте алмағаны үшін клуб 260 мың еуро алады. Бұған қоса, Еуропа лигасының топтық кезеңіне қатысқан әр командаға 2,6 миллион еуро беріледі. Бұдан бөлек, әр клуб маркетингілік құқық бойынша бонустарға ие бола алады.
Еуропа лигасының топтық кезеңіндегі екінші тур матчында «Астана» чехтің «Славия» командасымен тең ойнады.
Есеп - 1:1. 18-ші минутта камерундық қорғаушы Майкл Нгадеу-Нгаджуи «Славияны» алға шығарған. Алайда, алаң иелері бірінші таймның соңында, 43-ші минутта есепті теңестірді - хорват хавбегі Марин Томасов гол салды.
