Ауыр атлетика. Илья Ильин үлкен спортқа қайта оралды

Қазақстандық ауыр атлетшілер Илья Ильин мен Зульфия Чиншанлоның допингке қатысты жарыстан шеттету мерзімі аяқталды, енді олар жарыс тұғырына қайта орала алады

2008 және 2012 жылдардағы Олимпиада ойындарының допинг-сынамалары қайта тексерілгеннен кейін Илья Ильин, Зульфия Чиншанло, сонымен қатар Майя Манеза мен Светлана Подобедова алтын медальдарынан айрылды. Олардың сынамаларында тыйым салынған заттар табылып, төртеуі екі жылға жарыстардан шеттетілді. Жаза мерзімі 2018 жылдың 10 маусымында аяқталды.

Алдағы уақытта қос атлет Қазақстан чемпионатында бақ сынап, 2020 жылғы Токио Олимпиадасының жолдамасына таласуды жоспарлап отыр.