Садриддин Ахмедовтың жекпе-жегін "QAZSPORT" арнасы тікелей эфирден көрсетеді

Қазақстандық кәсіпқой боксшы Садриддин Ахмедов (6-0, 6 КО) кезекті жекпе-жегін 27 қаңтар күні Канаданың Монреаль қаласында мексикалық Абрахам Хуареске (13-1, 4 КО) қарсы өткізеді.

Аталған кездесуде WBC тұжырымдамасы бойынша жастар арасындағы Әлем чемпионы атағы сарапқа салынбақ. Жекпе-жек 10 раундқа есептелген.

Тартысқа толы бокс кешін 27 қаңтар күні таңғы 07:55-тен бастап "QAZSPORT" арнасының тікелей эфирінен тамашалай аласыздар.

Айта кетейік, Садриддин Ахмедов кәсіпқой бокста жастар арасындағы WBC чемпионадық атағына таласатын алғашқы қазақстандық боксшы болмақ.