«QAZSPORT» телеарнасының 5 жылдығына орай волейболдан жолдастық кездесу өтті
«QAZSPORT» телеарнасының 5 жылдығына орай және волейболдан Азия чемпионаты қарсаңында телеарна қызметкерлері мен Қазақстан волейбол федерациясы ұжымы арасында жолдастық кездесу өтті. Бұл жолы спорт журналистері алаңға жас жаттықтырушыларды шақырса, функционерлер жас төрешілерді қосып алды.
«QAZSPORT» телеарнасының құрамында қызметкерлерден бөлек Ұлттық құраманың бұрынғы ойыншысы Марат Иманғалиев (ол қазір «Алтайдың» жаттықтырушылар құрамында) өнер көрсетсе, волейбол федерациясында халықаралық дәрежедегі төрешілер Сани Берденов, Дәулет Қалиев, Дәурен Шушпаев және Қуатбек Айдарбеков сынды білікті мамандар күш сынады. Телевизиялық команда капитан ретінде телеарна директоры Павел Цыбулинді шығарды.
Кездесу барысында қос команда да жақсы өнер көрсетті. Алғашқы екі сетте тең есеп тіркелген болатын. Алайда, үшінші және төртінші сетте «QAZSPORT» арнасының қызметкерлері ойын тізгінін өз қолдарына алып, матчты өз пайдаларына шешті. Қорытынды есеп 3:1. Волейбол федерациясы еліміздің ең үздік спорт телеарнасы қызметкерлеріне осымен екі жыл қатарынан есе жіберіп отыр.
Естеріңізге сала кетейік, «QAZSPORT» телеарнасы әйелдер арасында өтіп жатқан клубтық деңгейдегі Азия чемпионатының ресми хабар таратушысы болып табылады. Турнир ойындарын телеарна тікелей эфирде көрсетеді.
