«Қайрат» және «Пахтакор» клубтарының ардагерлері Алматыда жолдастық кездесу өткізеді
7 қыркүйекте «Қайрат» футбол клубының 65-жылдығына орай «Қайрат» және «Пахтакор» клубтары ардагерлерінің қатысуымен қайырымдылық матчы өтеді. Бұл күні оңтүстік астанадағы «Орталық» алаңға «Орта Азия дербиі» қайта оралады. Ойыннан жиналған қаражат түгелімен «Kairat Blind Football Team» жобасына жолданады.
QAZSPORT телеарнасы Алматыдағы футбол мерекесін көрермен назарына ұсынады. Ардагерлердің қатысуымен өтетін кездесуді 7 қыркүйек күні сағат 20:40-тан бастап көре аласыздар. Сондай-ақ, тарихи матчты аты аңызға айналған спорт комментаторы, футболшы, қазақ журналистикасында өз қолтаңбасы бар Диас Омаров тізгіндейді. Өткен ғасырда «Қайрат» футбол клубының матчтарын жүргізген тұлға эфиге қайта оралады. Сонымен қатар белгілі қаламгер, ерекше стилімен «көрермен көзайымына» айналған спорт журналисі Есей Жеңісұлы ардагер комментатормен жұп құрады.
Осы күні Құралбек Ордабаев, Вахид Масудов, Мураджон Әлиев, Шухрат Рахмонкулов сынды ардагерлер жасыл алаңға қайта оралады.
Кеңес дәуірінде қос клубтың ойыны «Орта Азия дербиі» деген сипатқа ие болды. Араға жылдар салып қос ұжымның ойыншылары жасыл алаңда қайта қауышады. Тартысқа толы қайырымдылық матчын QAZSPORT арнасымен бірге тамашалаңыздар.
