Грек-рим күресінен Азия Чемпионаты өз мәресіне жетті

Күрес түрлерінен Астана қаласындағы Азия Чемпионатын грек-рим күресінің шеберлері бастап, барлық 10 салмақ дәрежесінде жеңімпаздар мен жүлдегерлер Жақсылық Үшкемпіров атындағы жекпе-жек сарайының боз кілемінде анықталды.

Жарыстың алғашқы күнінде Қазақстан құрамасының қоржынына 1 күміс және 2 қола жүлде түсті. 

87 келіде белдескен Нұрсұлтан Тұрсынов ақтық сында ирандық Насер Ализадеге есе 0:8 есебімен есе жіберіп, құрлықтық доданың күміс жүлдесін еншіледі.

Бұл Нұрсұлтан үшін Азия Чемпионатындағы екінші күміс жүлде. Естеріңізде болса, 2015 жылғы Дохада өткен Азия Чемпионатында күміс жүлде алған еді.  

Қола жүлдені 63 келі салмақта Мұхамедәлі Мамырбек пен 130 келіде Әлімхан Сыздықов еншіледі. Мұхамедәлі жапон балуаны Чейзо Маруяманы 9:0 есебімен жеңсе, Әлімхан оңтүстік кореялық Ким Мин Сокты 5:3 есебімен жеңді.

Екінші жарыс күнінде жарыс жолына шыққан бес спортшымыз да жүлдегер атанды. Алдымен 72 келі салмақта Ибрагим Магомадов чемпион атанса, 82 келіде белдескен Диас Қален күміс жүлдегер, Ернұр Фидахметов (60 келі), Алмат Кебіспаев (67 келі) және Олжас Сырлыбай (97 келі) Азия Чемпионатының қола жүлдегері атанды.