Әлем чемпионатының ашылу матчында кімдер алаңға шығады?

Футболдан әлем чемпионатының алғашқы матчы өтеді. Турнирдің ашылу матчында Мексика мен Оңтүстік Африка құрамалары кездеседі.

Қос команда 2010 жылғы әлем чемпионатының да шымылдығын ашып, 1:1 есебімен тең түскен. Биылғы дода Мехикодағы аңызға айналған «Ацтека» стадионында өтеді. Бұл арена тарихта тұңғыш рет үш бірдей әлем чемпионатының (1970, 1986, 2026) ашылу матчын қабылдағалы тұр.

Футбол жанкүйерлері матчты 11 маусым сағат 23:40-та «Qazaqstan» және «Qazsport» телеарналарының тікелей эфирінен тамашалай алады.

Сонымен қатар ойын qazaqstan.tv, qazsporttv.kz сайттарында және «Qazaqstan.tv» мобильді қосымшасы арқылы онлайн көрсетіледі.