Қазақстандық мәнерлеп сырғанаушы Францияда жеңіске жетті

Қазақстандық мәнерлеп сырғанаушы Элизабет Тұрсынбаева Францияның Ницца қаласында өткен «19th International Cup Of Nice» жарысында да жеңіске жетті. Ол қос бағдарлама қорытындысы бойынша 155,02 ұпай жинады. Қазақстан спортшысы екі бағдарламада да ең үздік нәтиже көрсетті. Екінші орында франциялық Марина Попов иеленсе, қола жүлдені ұлыбританиялық Даниелле Хариссон иеленді. 14 жастағы Элизабет Тұрсынбаева биыл қыркүйекте Аичиде (Жапония) өткен жасөспірімдер арасындағы әлемдік Гран-при жарысында қола, қазанда Дрезденде өткен Гран-приде күміс медаль алды. Бұдан бөлек ол биыл «Summer Skate Canada» (Торонто), «Triglaf Trophy» (Словения), «Gardena Spring Trophy» (Италия), «New Years Trophy» (Словакия) жарыстарында алтын жүлде алған. Енді Элизабет Тұрсынбаева 14-19 қарашада Миланда (Италия) өтетін «Merano Cup» кубогына қатысады. Одан кейін 9-15 ақпанда Сеулде (Оңтүстік Корея) болатын ересектер арасындағы «Төрт құрлықтың кубогына» барады, деп хабарлайды «Аламан».